今日晨早流流真係喺到考我嘅EQ， which I have none. Especially before my coffee.
有個韓國妹入嚟，佢月頭拗柴。我同事睇咗佢叫佢去急症。急症好唔好彩個醫生同佢講佢有骨折所以打咗石膏。終於等到骨科複診嘅時候，同佢講其實急症條友睇錯左。佢冇骨折，淨係傷到條筋。俾左個Walker同Brace佢。
琴日佢沖緊涼嘅時候差錯腳，唔小心用左隻傷咗嘅腳踩落地。今朝拿住個Walker過黎睇。
我幫佢做檢查，我未掂佢佢就嗌痛。㩒啲佢唔痛嘅地方，佢都嗌痛。我個下已經着咗。😡😡😡😡
我問佢痛唔痛，佢話唔痛。但係佢覺得就嚟會痛，所以叫咗先。咁我做檢查黎做乜嘢？算！
我同佢講，你叫到鬼殺咁嘈，我唔排除你今次可能真係骨折。所以你要照X光。佢死都唔肯。佢話急症等好耐所以唔去。我問佢有冇錢睇私家骨科，佢話冇。我問佢今日攞唔攞到病假，佢同我講今日要返學，所以唔攞。我幾可會俾病假人哋？
佢反而問我攞禮拜一嘅病假。今日最痛，你唔攞。 你返得到學。但係，四日之後你唔想返學，所以你想攞病假。咁樣係咪唔係咁合邏輯呢？我叫佢禮拜一再過嚟俾我望吓，有需要我就先至俾，我都好仁至義盡啦！佢話過嚟好遠所以唔想禮拜一再過嚟，所以想而家攞住先。對唔住，你可以搵你屋企附近嘅醫生睇又得。我冇叫你一定要搵我。叫你照X光又唔肯，我又唔知你係咪真係骨折。唔痛又叫，痛又叫，我點知你邊樣係真。隻腳腫都唔腫下你想我點？總之我唔鍾意啲人覺得自己幾時需要攞病假，先至去揀一個日子攞病假。我係唔係可以同我經理講我下個禮拜一會病，所以我要去迪士尼散心睇聖誕樹？我唔係話你呃假紙，但係我覺得你要合邏輯先得囉OK。今日唔使抖但係四日後先要抖。我唔明囉！
睇完呢個之後，一系列麻煩病人全部出動晒。好似約埋咁。唯一開心嘅，係琴日話自己重菜嘅病人唔知點解好鬼客氣攞咗半打蛋撻過嚟。但係跟住放工塞車塞到阿媽都唔認得。肚餓到我胃痛。所以我決定開咗支紅酒飲。激氣！
Search